Colectivo Audiovisual

O traballo solidario de Lentes Diverxentes foi unha contribución inestimable á campaña “Badaladas para a prevención do suicidio” impulsada polo Movemento Galego da Saúde Mental. Grazas ao seu esforzo comprometido puidemos dispor de dous vídeos fundamentais: o primeiro converteuse no gran argumento para a prevención e no noso mellor instrumento para a concienciación social e a denuncia da pasividade do Goberno Autonómico. O segundo, na memoria que deixa documentada unha mobilización social que logrou conseguir que a Xunta de Galicia asumira formalmente, coa elaboración e coa publicación do Plan de Prevención do Suicidio en Galicia, a súa responsabilidade na prevención dun dos máis graves problemas de saúde pública que padece a nosa comunidade. Só podemos agradecer ter traballado con vós.

Como dixera Sigmund Freud “podemos defendernos dos ataques mais contra os eloxios estamos indefensos” por iso vimos dicirvos hoxe: Seguide así: nada de eloxios e por suposto convosco, incondicionais ante os ataques veñan de onde veñan. Miramos ao noso arredor, observamos, analizamos, elaboramos estratexias, facemos chamamentos, convocamos e actuamos na procura dun mundo mellor e máis xusto e ao cabo… somos pesimistas. Mais cando miramos para o que facedes vós e vos sentimos de preto, moi a carón noso, a sensación muda. Cargamos as nosas baterías e de novo torna o optimismo. Seguimos. Seguide así!